Breo Clique – Fasnacht 2026
Mir danze mit em Deyfel

Egal, wo mir luege,
d Wält isch us de Fuege
und alles goht kaputt
Die Arme wärde ärmer,
s Klima als wie wärmer,
s Wätter spielt verruggt.

Wenn anderi dien stritte,
wähle mir e Sytte
und reihe uns yy.
Het die Sach e Hoogge,
mir stelle keini Frooge,
vertraue uff KI.

Wär git däm ganze Sinn?
Seit: alles nit so schlimm.
Wär duet so, wiene guete Fründ?
Wär länggt ab vom Problem,
damit mir’s nümmi gsehn?
Wär macht uff beide Auge blind?

Mir danze mit em Deyfel,
will die Musig grad so passt.
Und mir wüsse ganz genau,
mir sitze uff em Pulver-Fass
Hey, mir danze mit em Deyfel
die Melodie, die het-is paggt
und mir danze immer wyter
bis zum allerletschte Taggt.

Si griffe nach dr Macht
stürze über Nacht,
ohni freii Wahl.
Zum Üsserschte bereit,
d Propaganda seit:
alles ganz normal

So triibe si e Keil,
finde, dasch no geil,
finde, dasch no toll.
Wenn Gegewind verwacht,
wirsch du überwacht,
merggsch es nit emol.

Wär macht si so glamourös,
dass keine merggt, wie bös
und unverschämmt das vor sich goht?
Wär macht si populär,
eso rücksichtslos und wär
froggt: wärsch nit au gärn bitzli so?

Si danze mit em Deyfel,
will die Musig grad so passt.
Und si wüsse ganz genau,
si sitze uff em Pulver-Fass.
Hey, si danze mit em Deyfel,
die Melodie, die het-se paggt
und si danze immer wyter
bis zum allerletschte Taggt.

Dr Mephisto vor dr Tüür,
dr Liibhaftig hinter dir,
loggt mit Macht und Gier und Gäld.
Är stoht in sim schigge Kleid
als Faust und Mister Hyde,
grad in dr Mitti vo dr Wält.